மரபுக் கவிதை - 110

தமிழ்த் தாத்தா பஞ்சகம்

தடியூன்றும் வயதினிலும் தளராமல் தவிப்புடனே

துடிப்பாக சுவடிகளை தொடர்ந்தோடி சேகரித்த

சங்கத் தமிழின் தனிப்பெரும் புரவலனாம்

எங்கள் தமிழ்த்தாத்தா தான்.

ஊரூராய்த் திரிந்து உறுபொருள் செலவிட்டு

பாருய்யத் தமிழகத்தின் பழமையான இலக்கியத்தை

பாதுகாத்து அச்சிட்டுப் பாங்காகக் கொடுத்திட்ட

தூதர் தமிழ்த்தாத்தா தான்.

தமிழென்று சொன்னாலே தரணிக்கு நினைவில்வரும்

அமிழ்தான நூல்களினை அரித்தொழித்து தின்றுவந்த

சூழ்ந்த கரையானை சுட்டெரித்துத் தமிழ்காத்த

வாழ்வே தமிழ்த்தாத்தா தான்.

வாய்ச்சொல்லில் வீரரென வாழ்ந்தோரின் மத்தியிலே

ஆய்ச்சியர் குரவையும் அணித்தமிழ் இலக்கணமும்

பரவும் தமிழிசையின் பெருமிதத்தை ஊட்டியநல்

குருவே தமிழ்த்தாத்தா தான்.

ஆரணங்காம் தமிழ்த்தாயின் ஆபரண மானபெரும்
பூரணத்தின் மணித்திரளாம் புத்திளமை பூத்திருக்கும்
மங்காத இலக்கியங்கள் மாயாமல் காத்தவரே
எங்கள் தமிழ்த்தாத்தா தான்.

..

இன்று தமிழ்த் தாத்தா உ.வே.சா. பிறந்த நாள்.

.